காரைதீவில் தரம் 5 புலமைப்பரிசில் பரீட்சையில் சித்தியடைந்த மாணவர்களுக்குச் சாதனையாளர் கௌரவிப்பு!

 காரைதீவில் தரம் 5 புலமைப்பரிசில் பரீட்சையில் சித்தியடைந்த மாணவர்களுக்குச் சாதனையாளர் கௌரவிப்பு!

தவிசாளர் சுப்பிரமணியம் பாஸ்கரனின் ஏற்பாட்டில் நடைபெற்றது; சுமந்திரன், கோடீஸ்வரன் உள்ளிட்டோர் பங்கேற்பு

நூருல் ஹுதா உமர்

அம்பாறை மாவட்டம், காரைதீவு பிரதேச சபையின் தவிசாளர் சுப்பிரமணியம் பாஸ்கரனின் ஏற்பாட்டிலும் தலைமையிலும், 2025ஆம் ஆண்டு தரம் 5 புலமைப்பரிசில் பரீட்சையில் சித்தியடைந்த மாணவர்களைக் கௌரவிக்கும் சாதனையாளர் கௌரவிப்பு விழா இன்று (29) வியாழக்கிழமை காரைதீவு விபுலானந்தா கலாசார மண்டபத்தில் நடைபெற்றது.

'தவிசாளரின் எண்ணத்தில் உதித்தது' என்ற தொனிப்பொருளில் நடைபெற்ற இந்நிகழ்வு, கல்வியில் சாதனை படைத்த மாணவர்களைப் பாராட்டுவதுடன், அவர்களின் எதிர்காலக் கல்வி முன்னேற்றத்துக்கு ஊக்கமளிக்கும் நோக்கில் ஏற்பாடு செய்யப்பட்டது.

காரைதீவு பிரதேச சபையின் தவிசாளர் சுப்பிரமணியம் பாஸ்கரன் தலைமையில் நடைபெற்ற இந்நிகழ்வில், இலங்கைத் தமிழரசுக் கட்சியின் பொதுச் செயலாளரும் ஜனாதிபதி சட்டத்தரணியுமான எம்.ஏ. சுமந்திரன் பிரதம அதிதியாகவும், அம்பாறை மாவட்டப் பாராளுமன்ற உறுப்பினர் கவிந்திரன் கோடீஸ்வரன் முதன்மை அதிதியாகவும் கலந்துகொண்டனர்.

மேலும், மட்டக்களப்பு மாநகர முதல்வர் சி. பாக்கியநாதன், தென்கிழக்குப் பல்கலைக்கழகப் பேராசிரியர் க. கணேசராஜா, நாவிதன்வெளி பிரதேச சபைத் தவிசாளர் இ. ருபசாந்தன், ஆலையடிவேம்பு பிரதேச சபைத் தவிசாளர் ஆ. தர்மதாஸ், போரதீவுப்பற்று பிரதேச சபைத் தவிசாளர் வி. மதிமேனன், திருக்கோவில் பிரதேச சபைத் தவிசாளர் எஸ். சசிகுமார் ஆகியோரும் கௌரவ அதிதிகளாகக் கலந்துகொண்டனர்.

காரைதீவு பிரதேச சபையின் உப தவிசாளர் மு. ஹ. மு. இஸ்மாயில் மற்றும் பிரதேச சபை உறுப்பினர்களான கி. ஜெயசிறில், யோ. கோபிகாந்த், மு. ந. மு. றனீஸ், அ.ற. மு. ஹில்மி, சி. சிவகுமார், அ. பர்ஹாம், பிரதேச சபை செயலாளர், உத்தியோகத்தர்கள் உள்ளிட்டோரும் நிகழ்வில் பங்கேற்றனர்.

இதன்போது, புலமைப்பரிசில் பரீட்சையில் சித்தியடைந்த மாணவர்கள் கௌரவிக்கப்பட்டதுடன், அவர்களின் கல்விச் சாதனைகளுக்குப் பாராட்டுத் தெரிவிக்கப்பட்டது. மாணவர்களின் வெற்றிக்குப் பங்களிப்பு வழங்கிய அதிபர்கள், ஆசிரியர்கள் மற்றும் பெற்றோர்களின் அர்ப்பணிப்பும் இவ்வாறான நிகழ்வுகளின் மூலம் அங்கீகரிக்கப்பட்டது.

கல்வி என்பது தனிநபரின் முன்னேற்றத்துக்கு மட்டுமன்றி, சமூகத்தின் எதிர்கால வளர்ச்சிக்கும் அடித்தளமாக விளங்குகிறது. அந்த வகையில், கிராமப்புற மாணவர்களின் கல்வி அடைவுகளை அடையாளம் கண்டு பாராட்டுவதும், அவர்களிடையே மேலும் உயர்ந்த இலக்குகளை நோக்கிச் செல்லும் ஆர்வத்தை ஏற்படுத்துவதும் இத்தகைய கௌரவிப்பு நிகழ்வுகளின் முக்கியத்துவமாகும்.

இந்நிகழ்வில் அதிபர்கள், ஆசிரியர்கள், மாணவர்கள், பெற்றோர்கள் உள்ளிட்ட பலரும் கலந்துகொண்டனர்.

காரைதீவு பிரதேச சபையின் தவிசாளர் சுப்பிரமணியம் பாஸ்கரனின் ஏற்பாட்டில் நடைபெற்ற இக்கௌரவிப்பு விழா, கல்விச் சாதனையாளர்களைப் பாராட்டும் உள்ளூராட்சி மட்டத்திலான முயற்சியாக அமைந்தது.