தொடுவாவை பகுதியில் இருந்து மீன்பிடிக்க சென்ற முதியவர் மாயம் தேடும் பணி தொடர்கிறது
தொடுவாவை பகுதியில் இருந்து மீன்பிடிக்க சென்ற முதியவர் மாயம்
தேடும் பணி தொடர்கிறது
(கற்பிட்டி எம் எச் எம் சியாஜ்)
தொடுவாவை, பருதெல்பொல பகுதியைச் சேர்ந்த 66 வயதான வர்ணகுலசூரிய சுனில் பெர்னாண்டோ என்ற முதியவர், வழமை போல் தனது வாழ்வாதாரத்திற்காகக் கடலை நோக்கிப் புறப்பட்டார். கடந்த திங்கட்கிழமை (02) அதிகாலை 4.00 மணியளவில் மீன்பிடிப்பதற்காகத் தெப்பத்தில் சென்ற அவர், நீண்ட நேரமாகியும் கரை திரும்பவில்லை. இதனால் பதற்றமடைந்த அவரது உறவினர்கள், தொடுவாவை பொலிஸ் நிலையத்தில் உடனடியாக முறைப்பாடு பதிவு செய்தனர்.
பொலிஸாரும் உறவினர்களும் அவர் வருவார் என ஆவலோடு காத்திருந்த வேளையில், ஆழ்கடல் பகுதியில் அவர் சென்ற தெப்பமும், மீன்பிடி வலை உள்ளிட்ட உபகரணங்களும் ஆளற்ற நிலையில் தனியாக மிதந்து கொண்டிருப்பதை சக மீனவர்கள் அவதானித்துக் கண்டுபிடித்தனர்.
மீனவர் இன்றி படகு மட்டும் அநாதையாக மிதந்த காட்சி, அப்பகுதியில் நிலவிய சீரற்ற வானிலையினால் ஏற்பட்ட விபத்தை உறுதிப்படுத்துவதாக அமைந்தது. கடல் கொந்தளிப்பு காரணமாக தெப்பம் கவிழ்ந்திருக்கலாம் என பொலிஸார் ஆரம்பக்கட்ட விசாரணைகளில் சந்தேகம் வெளியிட்டுள்ளனர்.
தற்போது கடலில் மாயமான சுனில் பெர்னாண்டோவை எப்படியாவது உயிருடன் மீட்டுவிட வேண்டும் என்ற நோக்கில், அப்பகுதி மீனவர்கள் ஒன்றிணைந்து ஆழ்கடலில் தீவிர தேடுதல் நடவடிக்கையை முன்னெடுத்து
வருகின்றனர்.
No comments