பெரும் நிதி நெருக்கடியில் ஸ்ரீலங்கன் விமான சேவை - எடுக்கப்பட்டுள்ள அவசர நடவடிக்கை
ஸ்ரீலங்கன் விமான சேவையின் நிதி நெருக்கடிக்கு தீர்வு காணும் வகையில் விசேட நடவடிக்கைகள் முன்னெடுக்கப்பட்டுள்ளன.
ஸ்ரீலங்கன் விமான சேவை நிறுவனம் எதிர்வரும் இரண்டு அல்லது மூன்று ஆண்டு காலப்பகுதில் அதன் செலவுகளை ஈடுகட்டக்கூடிய நிலைக்கு கொண்டுவருவதற்காக எடுக்கப்பட வேண்டிய நடவடிக்கைகள் தொடர்பிலும் ஆராயப்பட்டுள்ளன.
இதற்கமைய, விரிவான அறிக்கையொன்றை இம்மாதம் 30 திகதிக்கு முன்னர் நாடாளுமன்றத்திற்கும், அமைச்சுக்கும் சமர்ப்பிக்குமாறு உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழு அதிகாரிகளுக்கு குழு அறிவுறுத்தியுள்ளது.
ஸ்ரீ லங்கன் விமான சேவை எதிர்நோக்கியுள்ள நிதி நெருக்கடி, விமானப் பயணத் தாமதங்கள், கடன் சுமை மற்றும் புதிய விமானங்களை கொள்வனவு செய்வதில் ஏற்பட்டுள்ள கொள்வனவு நடைமுறைத் தாமதங்கள் தொடர்பில் உட்கட்டமைப்பு வசதிகள் மற்றும் மூலோபாய அபிவிருத்தி பற்றிய துறைசார் மேற்பார்வைக் குழுவில் விரிவாக கலந்துரையாடப்பட்டுள்ளது.
தற்போது 23 விமானங்களைக் கொண்டுள்ள விமான சேவையின் விமான தொகுதி போதுமானதாக இல்லாமை மற்றும் அந்த விமானங்கள் சுமார் 12 வருடங்கள் பழைமையானவையாக இருப்பதால் விமானப் பயணங்களைப் பாதிக்கும் தொழில்நுட்பக் கோளாறுகள் மற்றும் தாமதங்கள் தொடர்பில் இதன்போது கலந்துரையாடப்பட்டுள்ளது.

No comments