கற்காலம் முதல் AI வரை நாத்தாண்டியவில் சகலரையும் சிந்திக்க வைத்த பிரம்மாண்ட நூலகக் கண்காட்சி

 கற்காலம் முதல்  AI வரை நாத்தாண்டியவில் சகலரையும் சிந்திக்க வைத்த பிரம்மாண்ட நூலகக் கண்காட்சி

(கற்பிட்டி எம் எச் எம் சியாஜ்)

மனிதன் குகைகளில் குறியீடுகளைக் கீறிய கற்காலம் எங்கே… இன்று விரல் நுனியில் செயற்கை நுண்ணறிவு (AI) உலகையே புரட்டிப் போடும் அதிநவீன யுகம் எங்கே...இந்த நீண்ட தூர வரலாற்றுப் பாதையில் அறிவுப் பெட்டகங்களான நூலகங்கள் எவ்வாறெல்லாம் உருமாறி வந்துள்ளன என்பதை ஒரே கூரையின் கீழ் கொண்டுவந்து அசத்தியுள்ளது நாத்தாண்டியவில் இடம்பெற்ற நூலக கண்காட்சி

நாத்தாண்டிய பிரதேச சபையின் முன்னெடுப்பில், நாத்தாண்டிய நகர மண்டபத்தில் இரு தினங்களாக இடம்பெற்ற விசேட வரலாற்று மற்றும் தொழில்நுட்பக் கண்காட்சி அப்பகுதி மக்களிடையே பெரும் வரவேற்பைப் பெற்றதுள்ளது.

நாத்தாண்டி பிரதேச சபையின் கீழ் இயங்கும் 15 பொது நூலகங்கள் ஒன்றிணைந்து, நூலகங்களின் இந்த அசாத்திய பரிணாம வளர்ச்சியைப் பலதரப்பட்ட நவீன உத்திகள் ஊடாக உயிர்ப்பித்துக் காட்டியிருந்தன.

கற்குகைச் சுவர்களிலிருந்து கணினித் திரைக்கு வாசிப்பின் வியக்கத்தக்க மறுபக்கம்

இன்றைய ஸ்மார்ட்போன் யுகத்தில் மாணவர்களிடையே நூலகங்களுக்குச் செல்லும் பழக்கம் ஆபத்தான நிலைக்கு தள்ளப்படு  குறைந்து வருவதே இந்த நூலக கண்காட்சி முயற்சிக்கான முக்கிய தூண்டுகோலாகும்.

 இது குறித்துக் கருத்துத் தெரிவித்த நாத்தாண்டிய நூலக வாசகர் சங்க உப தலைவர் ஜயகுமார நோனிஸ், நூலகங்களைப் பயன்படுத்தும் ஒரு சிலருக்குக் கூட அதன் பூர்வீக வளர்ச்சிப் படிநிலைகள் தெரிந்திருக்கவில்லை எனச் சுட்டிக்காட்டினார். அத்தோடு, பாடசாலை மாணவர்கள் தங்களது வரலாறு மற்றும் சமூகக் கல்விப் பாடங்களுக்குத் தேவையான அரிய தகவல்களை இங்கிருந்த காட்சிக்கூடங்கள் மூலமாக நேரடியாகப் பெற்றுக்கொள்ள முடிந்ததாகவும் அவர் குறிப்பிட்டார்.

இருப்பினும், இவ்வாறானதொரு பாரிய வரலாற்றுத் தரவுகளைத் திரட்டி கண்காட்சியாக உருவாக்குவது அத்தனை எளிதான காரியமாக இருக்கவில்லை. தகவல் சேகரிப்பில் நிலவிய கடுமையான சவால்களுக்கு மத்தியில், பிரதேசத்தின் 15 நூலகங்களின் உத்தியோகத்தர்களும் அர்ப்பணிப்புடன் களமிறங்கியதாலேயே இதனை முழு வெற்றியாக மாற்ற முடிந்தது என நாத்தாண்டிய சமூக அபிவிருத்தி உத்தியோகத்தர் சமந்த விஜேதுங்க நெகிழ்ச்சியுடன் தெரிவித்தார்.

நாத்தாண்டிய நகரத்தில் பெரும் தாக்கத்தை ஏற்படுத்தியுள்ள இக்கண்காட்சியை, வேறு  பிரதேசங்களிலிருந்தும் கோரிக்கைகள் வரும் பட்சத்தில் ஏனைய நகரங்களுக்கும் எடுத்துச் சென்று எதிர்காலச் சந்ததியினருக்கு அறிவூட்டத் திட்டமிடப்பட்டுள்ளது. 

இந்நிகழ்வின் ஆரம்ப விழாவில் நத்தாண்டிய பிரதேச சபையின் தலைவர் சாகர விஜேசேகர உள்ளிட்ட முக்கிய பிரமுகர்கள், கல்விமான்கள் மற்றும் நூற்றுக்கணக்கான மாணவர்கள் கலந்துகொண்டனர் என்பதும் குறிப்பிடத்தக்கது