சாய்ந்தமருது அல்-ஹிலால் வித்தியாலயத்தில் சிறப்புடன் நடைபெற்ற மீலாதுன் நபி விழா : ஆன்மீக எழுச்சியுடன் மாணவர்களின் கலை, கலாசார நிகழ்வுகள்!!

(நூருல் ஹுதா உமர்) சாய்ந்தமருது அல்-ஹிலால் வித்தியாலயத்தில் 2026ஆம் ஆண்டுக்கான மீலாதுன் நபி விழா, கடந்த 09.09.2026 புதன்கிழமை அதிபர் கே.எல்.ஏ. ஜௌபர் அவர்களின் தலைமையில் மிகவும் சிறப்பாகவும் ஆன்மீக எழுச்சியுடனும் நடைபெற்றது. நபிகள் நாயகம் முஹம்மத் (ஸல்) அவர்களின் உன்னத வாழ்க்கை, உயரிய பண்புகள், மனிதநேயம், அன்பு, சகோதரத்துவம் மற்றும் நல்லொழுக்க விழுமியங்களை மாணவர்கள் மத்தியில் எடுத்துச் செல்லும் நோக்கில் இவ்விழா ஏற்பாடு செய்யப்பட்டிருந்தது. கல்வி அமைச்சின் சுற்றுநிருபத்திற்கு அமைவாக ஏற்பாடு செய்யப்பட்ட இந்நிகழ்வின் பணிகள், பாடசாலையின் பிரதி அதிபர் திருமதி ரோஷன் டிப்றாஸ் அவர்களின் வழிகாட்டலில், பகுதித் தலைவர் கே.எம். நாசர் மற்றும் ஆசிரியர் மேஜர் எம்.எஸ்.எஸ். சிப்லி ஆகியோரின் ஒருங்கிணைப்பில் சிறப்பாக முன்னெடுக்கப்பட்டன. விழாவின் பிரதான நிகழ்வாக மௌலவி ஏ. எம். தௌபீக் (நளீமி) அவர்களினால் நபிகள் நாயகம் (ஸல்) அவர்களின் சிறப்புகள், உயரிய நற்பண்புகள் மற்றும் அவர்களின் வாழ்க்கை மனித சமூகத்திற்கு வழங்கும் முன்மாதிரிகள் தொடர்பில் சிறப்பான ஆன்மீகச் சொற்பொழிவு நிகழ்த்தப்பட்டது. மாணவர்களுக்கும் ஆசிரியர்களுக்கும் பயனுள்ள அறிவுரைகளையும் சிந்தனைகளையும் வழங்கிய அவரது உரை, நபிகள் நாயகம் (ஸல்) அவர்களின் வாழ்க்கை முன்மாதிரிகளை மாணவர்கள் தமது அன்றாட வாழ்வில் கடைப்பிடிக்க வேண்டியதன் முக்கியத்துவத்தை எடுத்துரைப்பதாக அமைந்தது. இதனைத் தொடர்ந்து, மாணவர்களின் திறமைகள் மற்றும் படைப்பாற்றலை வெளிப்படுத்தும் வகையில் பல்வேறு கலை, கலாசார மற்றும் ஆன்மீக நிகழ்வுகள் இடம்பெற்றதுடன், அவை விழாவிற்கு மேலும் சிறப்பூட்டின. நிகழ்வின் நிறைவாக விழாவில் கலந்து கொண்ட அனைத்து மாணவர்களுக்கும் நார்சா உணவு வழங்கப்பட்டு உபசரிக்கப்பட்டது. இதன் மூலம் மாணவர்களிடையே மகிழ்ச்சியுடன் கூடிய சகோதரத்துவ உணர்வும் ஒற்றுமையும் மேலும் வலுப்படுத்தப்பட்டது. இந்நிகழ்வில் பாடசாலையின் பிரதி அதிபர் எம். எச். லாபீர், பகுதித் தலைவர்கள், ஆசிரியர்கள், அபிவிருத்தி உத்தியோகத்தர்கள் மற்றும் கல்விசாரா ஊழியர்கள் உள்ளிட்ட பலரும் கலந்து கொண்டு விழாவைச் சிறப்பித்தனர். மாணவர்களின் மத்தியில் இஸ்லாமிய விழுமியங்கள், நல்லொழுக்கம், அன்பு, ஒற்றுமை மற்றும் மனிதநேயப் பண்புகளை வளர்க்கும் வகையில் ஏற்பாடு செய்யப்பட்ட இம்மீலாதுன் நபி விழா, பாடசாலை சமூகத்தினரின் அர்ப்பணிப்பான பங்களிப்புடன் மிகவும் சிறப்பாகவும் வெற்றிகரமாகவும் நிறைவடைந்தது. மாணவர்களின் மத்தியில் இஸ்லாமிய விழுமியங்கள், நல்லொழுக்கம், அன்பு, ஒற்றுமை மற்றும் மனிதநேயப் பண்புகளை வளர்க்கும் வகையில் ஏற்பாடு செய்யப்பட்ட இம்மீலாதுன் நபி விழா, பாடசாலை சமூகத்தினரின் அர்ப்பணிப்பான பங்களிப்புடன் மிகவும் சிறப்பாகவும் வெற்றிகரமாகவும் நிறைவடைந்தது.